絲絲講場：內地三大油企舵手執位
早前講過中石化（00386）董事長蘇樹林獲中央正式委任為福建省委副書記，至於邊個會坐佢個位就一直冇消息，不過中海油（00883）發言人話，中石化董事長一職將會由中海油董事長傅成玉轉任，佢同時仲做埋中石化集團黨組書記，至於中石化總裁王天普亦會「升呢」做集團總經理。
傅成玉傳轉掌中石化
蘇樹林咁樣郁一郁，三大石油公司即時執位，消息話傅成玉將辭任中海油董事長一職，另一大油企中石油（00857）嘅董事兼集團副總經理王宜林，就會接替傅成玉喺中海油嘅職務。有內地老友話，中石化喺尋日上晝已經召開會議，一位中組部副部長仲宣布咗對傅成玉及王天普嘅任命，不過中海油內部就仲未傳達呢次任命。
話時話，中海油及中石化嘅話事人都有新去向，暫時就未有中石油董事長蔣潔敏嘅份，不過坊間已經估佢好有可能好似蘇樹林咁，去做某南方省份地方官員，石油石化呢個界別真係人才輩出！
余絲韻