「股神」巴菲特一向好玩得，絲絲記得佢曾經扮鬼扮馬，戴假髮兼着埋戲服娛人娛己，最近佢仲扮醉酒佬兼「吹喇叭」。
話說南京大學搞咗個「巴菲特財富之旅──海外遊學團」嘅活動，一大班內地學生去美國與股神同枱共進午餐，更有機會將手放喺股神嘅錢包上合照，沾吓股神嘅「財氣」。股神對中國學生亦似乎特別熱情，席上擺出不同嘅甫士，與眾人盡情合照。
股神舉杯祝福之際，有學生揸住一支中國白酒，打算要送畀股神；一向唔飲白酒嘅股神立即作狀「吹喇叭」，放低酒樽後又扮醉。見到年過八十嘅股神咁精靈，搞到學生們都話成餐飯只記得笑同埋合照，反而唔記得自己食咗啲乜。
對上一次「與股神午宴」嘅慈善拍賣午宴，作價係211萬美元。如果換轉平時，食完價值200幾萬嘅午餐，而有「唔知食咗乜」嘅感覺，你肯定會「鬧爆」間餐廳，但出席今次午餐嘅同學們，反而話與巴菲特共進午餐嘅意義，就係「與巴菲特進餐」，而唔係桌上嘅食物，可見股神果然魅力非凡！
余絲韻