清明假期前，港股展現強勢，但講到市場焦點，就非零售股莫屬，事關旅發局公布，去年訪港旅客消費總額接近2,100億元，創歷史新高，消息刺激一眾本地零售股做好，其中景福（00280）單日勁升三成最誇張，其他珠寶金飾股亦唔失禮，英皇鐘錶珠寶（00887）升9.4%。
訪港旅客消費創新高，其實並不令人意外，只要走去尖沙咀等商業區行一轉，就會感受到內地旅客「血拼」嘅狠勁。因此詩詩覺得，零售股勁升，主要都係因為之前已回落咗一段時間，消化完去年下半年嘅升幅，於是又再炒過。何況彤叔嘅周大福正計劃上市，亦可望帶動珠寶金飾股炒風。
詩詩愛股英皇鐘錶上月中自0.83元低位回升，周一收報1.04元。雖然集團去年盈利呈倒退，但主要是可換股債券及認股證公平值調整所致，未來集團將進一步擴展內地零售網絡，並將拓展2、3線城市市場，前景樂觀，可於1元水平跟進，短線睇1.2元，止蝕0.92元。
詩詩