市場熱線：中海石化挑戰高位

「五一黃金周」有排未到，但周一狂炒零售股，唯一解釋係旅發局預計今年旅客又有高增長，不過淨係追落後已有足夠理由。講到零售股涉及好多因素，旅客增長、本地人收入、最低工資實施、舖租、通脹等等，但古勝認為係技術反彈多過轉勢，而祖國零售股前景又好過本地零售股。

人行又喺假期出招，宣布加息0.25厘，為今年第二次加息。揀喺清明節嚟出手，真係估佢唔到，相信今日本地魚缸都會借勢消化一下呢幾日升幅。

航運股落後有得諗

石油裝備商海隆（01623）話下個禮拜捲土重來再招股，刺激巨濤（03303）、安東（03337）及天大（00839）等影子股急升，其實油價升得咁高對佢哋生意亦有幫助。奶股又再升過，祖國話有一半奶企未通過檢測，同胞網民猛鬧點解唔公布不合格奶企名單？總之呢次檢測會益咗大企業，幾隻奶股得雅士利（01230）公布獲內地乳製品生產許可證，但周一係得呢隻唔升。

另一單有關國策嘅消息話三網融合已夭折，原因係各部門爭地盤搵着數，結果一拍三散。電訊設備股呢排風光過後打入冷宮，中興（00763）畀愛立信告，中通服（00552）玩供股，暫時要改玩落後股，在下覺得航運股有得諗，話晒呢一年已跑輸大市，雖然講基本因素只係普普通通，但炒落後唔使理咁多。中聚雷天（00729）周一復牌急插18%，傳聞有內訌股東擬以每股0.55元試盤批股，此股暫宜觀望。

甲醇業務愈做愈大

老古業績前推介一拖（00038），隻股呢排不斷創新高，農業股第二梯隊係化肥股：中海石化（03983）同中化肥（00297），後者因業績差連日冇厘精神，但中海石化周一就升多6%，距離52周高位只係差3粒神，其實隻股已唔單止農業概念，公司甲醇業務比重已愈來愈大，舊年分部稅前利潤增長逾倍，油價升到咁高，甲醇作為替代品亦會受惠，而海南二期喺舊年尾已開始商業營運。

中海石化雖然有姐妹中海油（00883）以優惠價格提供天然氣，但天然氣一路加價亦唔係辦法，所以公司近年積極收購煤礦，希望原料可自給自足，而中海石化始終佔有成本同規模優勢，阿爺今年嘅口號係生產1萬億斤糧食，生產多亦自然需要更多化肥。

國際農產品價格不斷創新高，所以亦刺激國際化肥價格，中海石化舊年尿素出口比重已由24.7%提高到32.2%，其華鶴煤化嘅52萬噸尿素項目預期喺一三年投產。依家尿素價格由舊年尾嘅每噸2,000元人仔回落到1,800元人仔左右，但隨住春耕展開，價格應有機會重返高位。中海石化具化肥同甲醇雙重概念，今年可望會跑贏大市。

戰報

中國保綠資產（00397）+25%

中國保綠資產周一炒上高位0.192元，較古晨上月二十一日推介時低位0.153元，累升逾25%。

恒大地產（03333）+23%

帥哥上周三推介恒大地產，當日低位4.04元，本周一再炒上，高見4.99元，最多賺超過23%。

古勝