絲絲講場：馬明哲撐新軍年輕有為
平保（02318）經歷○八年收購富通股權蝕到入肉後，當年嘅管理層相繼換班，董事長兼首席執行官馬明哲尋日就話，新一批接棒嘅管理層個個年輕有活力，必可令平保走得更遠更好。
平保近年高管確係經歷巨變，前集團總經理兼執行董事張子欣嘅總經理職務已經由任匯川接任，張子欣喺股東大會後由執董變為非執行董事；前首席保險業務執行官梁家駒就退休享清福，輾轉由李源祥接棒；前首席投資執行官約翰皮爾斯（John Peace）亦離咗職，依家嘅投資重任主要交託副首席投資執行官陳德賢。
帶領走得更高更遠
任匯川、陳德賢、李源祥、首席財務官姚波及總精算師張振堂尋日分別出席港滬記者會。馬明哲話除咗佢自己之外，呢5位高管個個都好年輕，既有精算師，又有來自香港、新加坡等地嘅精英，又曾經喺國際機構工作，而且只係40歲左右，一定可以將平保帶到更高更遠咁話喎。
余絲韻