互聯網嘅世界咁大，但賺錢嘅業務好似來來去去都係得嗰幾類，做開電子商務嘅阿里巴巴（01688）主席馬雲就話，佢自己一直都有「踩過界」做互聯網搜尋器，目的除咗係協助公司業務增長外，仲有就係希望內地搜尋器「老大」百度瞓唔着，咁最大得益就係廣大嘅網民嘞。
馬雲喺深圳一個IT論壇自爆話，喺○六年即係買入雅虎中國嘅第二年就開始調整策略，但並唔係以Google或百度做目標，而係要藉着互聯網搜尋器業務，將一直做緊嘅B2B（商業對商業）、B2C（商業對消費者）等電子商務做得更好。
佢仲笑言IT嘅領域好自由，係人都有機會參與，喺搜尋引擎領域踩一腳，情況就好似多國部隊轟炸利比亞一樣；不過佢其後亦好謙虛咁話，自己並唔係帶頭轟炸嘅人，極其量只係「多國部隊」嘅其中一員，目的並唔係打敗百度，而係「搖晃」佢哋一下，希望佢哋「冇覺好瞓」，喺競爭之下，得益嘅自然係網民及企業啦。
至於近年網上興起嘅「雲計算」及微博可以點樣賺錢？馬雲話正如阿里巴巴喺12年前做B2B都唔知道要點樣賺錢，但做落有人使用，業務就發展起來，只要對社會有貢獻，佢哋就會好簡單咁做落去。
余絲韻