永亨銀行（00302）早前公布嘅業績好靚仔，盈利升咗35%，有成16.25億元，絲絲覺得算係交足功課。唔知係咪咁嘅原因，永亨管理層嘅酬金亦都好和味，董事長馮鈺斌（Patrick）嘅花紅加酬金已經有2,060.7萬元，比前年多咗26%。
睇埋永亨嘅其他管理層，高級總經理馮鈺聲（Michael）嘅花紅加酬金多咗29%，有1,066萬元；副行政總裁王家華（Frank）亦有29%加幅，穩袋1,316.9萬元。絲絲真係好羨慕，我哋呢啲打工仔一年加嗰3%已經算好彩。
不過絲絲心諗，除咗我哋呢啲打工仔眼紅，相信一班中資銀行管理層都會好心噏，佢哋嘅成績表同樣交足功課，但有好多管理層嘅人工就與業績相反，不斷咁縮水。不過佢哋好忠心，減人工都繼續畀心機做好份業績，希望下年人工可以加番啲，補償吓呢班勞苦功高嘅管理層啦！
余絲韻