自滙控（00005）去年人事大變動後，前行政總裁紀勤已經退居幕後，轉做集團顧問，應該喺本月底就完結，佢與大笨象嘅關係就好似啲分咗手嘅情侶，明明話分手，但又要保持聯絡咁。絲絲喺年報發現，紀勤完咗本月嘅顧問工作之後，會擔任集團外聘顧問直至今年六月底，唔知佢之後又會唔會用其他名義繼續與「大笨象」嘅關係呢？
至於大笨象另一個重要人物──佢哋嘅CEO歐智華又再度成為熱話，原因係佢嘅薪酬計劃，令佢可以袋1,250萬英鎊，滙控薪酬委員會主席約翰桑頓又收到投訴話，好唔滿意歐智華收咁多錢。今次邊個投訴？咪就係英國保險業協會囉，佢哋話有投資者不滿喎！
約翰桑頓喺上周五就向呢個會解釋新嘅報酬計劃，之前仲逐一 與主要投資者見面，不過一眾投資者好似唔係好滿意，認為新方案嘅薪酬加花紅仍然過高，相信今次通唔通過，仲要等到五月二十七日股東周年大會表決結果至有分曉。
余絲韻