港交所（00388）喺下月二十日開股東會，絲絲發現主席夏佳理及一班非執董有人工加，分別加5萬元及3.5萬元，即係話夏佳理每年酬金加到55萬元，每名非執董酬金就有38.5萬元。
除咗開董事會會議外，港交所亦擬向部分委員會嘅主席及每名其他成員，分別支付每年10萬元及7萬元酬金，但董事每次出席該等委員會會議嘅2,500元費用就維持不變。港交所行政總裁李小加去年收入大豐收，呢班董事一年要開咁多次會，加人工都係人之常情！
喺今次嘅股東會，兩名要重選嘅董事分別係李君豪及郭志標，但暫時仲未傳出邊個有意出嚟挑戰兩人參選嘅消息。
雖然按例喺開股東會前7日，股東仍可提名候選人出嚟選董事，但一般情況下，若今日仲冇人出嚟參選，兩人連任機會就睇高一線。兩人喺港交所○○年時上市已入局，曾與歷任主席及行政總裁合作。
至於政府委任董事，今年有3人到期，其中許照中及利子厚按例可再獲委任，但張建東就因任期夠6年，未必會再獲委任，換言之今年好有可能有新血加入。張建東唔做港交所，會唔會過檔證監會做主席呢？有資深「賓卡」分析話，雖然方正今年底約滿，但佢只做咗5年，仍然可多做一年，最重要係今年證監會換行政總裁，會唔會今年同時換主席？大家不妨諗諗。況且張建東依家係滙控（00005）非執董，呢個係好光榮嘅職位，佢未必會放棄。
今次股東會仲有一個特別之處，係港交所7年來首次再尋求發行新股嘅一般性授權，原因係港交所計劃以股代息。「股壇長毛」David Webb就撰文，今次唔係與港交所唱對台，而係呼籲股東投贊成票，因為今次發行新股一般性授權係10%，若分配股份以現金支付更只係5%，佢自然讚好。
余絲韻