市場熱線：北控水務走勢硬淨

業績股繼續大上大落，勁跌嘅有王朝（00828）、重農行（03618）、華耐（01020）等，但勁升嘅亦有武夷藥業（01889）、陽能（00757）等，重農行上月創完新低再創新高最為經典，尋日勁插12.5%並非無端端，原因係該行喺分析員會議度預測今年貸款增長得17%，其實阿爺今年三度加RRR又實施差別存款準備金率，應該早有心理準備。

雨潤合長線投資

好多公司有業績前恐懼症，雨潤（01068）尋日收市後派成績表幾有驚喜，賺多56.3%，一○年PE降到15.2倍，財政狀況變淨現金。雨潤係古勝心目中嘅長線投資佳選，雖然呢排受到雙匯嘅瘦肉精事件波及，但長線更有利公司擴大劏豬行業嘅市佔率，最難得嘅係無論豬價升跌，佢嘅毛利率都創新高。

第一視頻（00082）盈利亦係有好大增長，隻股呢大半年唔上唔落，完全冇咗以前嘅炒味，但老古知道好多散戶仍鍾情呢隻股。計一○年PE係17.7倍，同孖屐預期差唔多，但較特別嘅係3項業務並非「三分天下」，而係傳統互聯網業務佔咗經營溢利一半有多。老古認為隻股可逢低吸納炒上落，但高追則制唔過。

古勝前排推介嘅中國燃氣（00384）近9日升咗7日，累計升咗32%，仲升穿埋前度老細「失蹤」前水平，究竟間公司最後會由中、台、韓、阿曼邊個打骰？但短炒嘅唔理咁多可以先行獲利。

具潛在利好因素

在下喺上月初推介過北控水務（00371），隻股其後上過接近3蚊，然後回落到2.5元樓下即有支持，尋日反彈7.3%收報2.65元，係因為簽咗13億銀團貸款嘅消息刺激？抑或係炒業績呢？總之北水喺二三線股當中已算相當硬淨，幾樣能源爭崩頭，但水就係非用不可。

北水全年成績表應該唔差，但亦唔會有乜驚喜，皆因水費同污水處理費有數得計，但未來支持股價上升因素包括加水費同向阿媽買資產，既然股價保持硬淨，老古建議如果唔跌穿2.4元仲可以揸實，有機會重上3蚊，但當然要睇埋業績報告有乜嘢講。

此外，老古鍾情嘅另一水股中國水務（00855）頻頻見大股東增持，但可能因要壓價買貨嘅關係，股價反而唔多見點郁，現處於三角形走勢，亦可繼續持有。

戰報

華晨汽車（01114）

高仁上周三吼中隻華晨，果然無睇錯，尋日高見7.64元，較推介當日低位6.5元，大升逾17%。

兗州煤業（01171）

小尾本月十五日話兗煤強勢持續，尋日升抵27.3元，以當日低位23.45元計，累升逾16%。

古勝