絲絲講場：簡文樂喜做匈國領事
絲絲科技界老友──冠軍科技（00092）嘅老細簡文樂，最近獲得匈牙利政府委任為匈牙利駐港澳特別行政區名譽領事，絲絲都替佢開心，佢尋日仲去咗匈國駐港領事館嘅開幕禮添。
十年前已一見鍾情
簡文樂同絲絲講，佢同匈國嘅緣分已經好耐，大約係喺十年前開始，當時去到呢個國家就對佢「一見鍾情」，對匈國嘅歷史、文化、建築等都驚嘆不已，絲絲初聽之下，都心有同感，匈國係好多港人鍾意去嘅旅遊熱點，特別係鍾意浪漫嘅情侶。點解咁多人去當地，皆因匈國歷史悠久，充滿歐陸風情，鍾意浸溫泉嘅人更唔會錯過，皆因匈國有「溫泉之都」嘅美譽，如果唔講，大家仲以為係日本添。
不過，絲絲記得，匈國今次邀請老友出任呢個位，相信多少同佢早年已經出任匈牙利─香港創新商務促進會召集人有關，而匈國自○四年加入歐盟後，現時喺東歐國家中，匈國已經成為香港最大嘅出口市場，老友都算功不可沒。
余絲韻