絲絲睇番歐智華份人工，底薪有125萬鎊，高過紀勤嘅108萬鎊，即係話佢嘅花紅其實已經少過紀勤。不過喺金融海嘯後，大家對於銀行家嘅薪酬好敏感，滙控嘅主要股東有一大籮，睇嚟薪酬委員會主席約翰桑頓要說服投資者，真係一項幾艱巨嘅任務。
欠透明度惹不滿
依家銀行家拎花紅已經好多限制，不過佢哋嘅福利仍不可睇小，例如滙控仍諗住派多62.5萬鎊畀歐智華作退休用，股東最不滿嘅就係唔知條數點定出嚟，唔夠透明度，而約翰桑頓亦應承喺五月會有新方案。事實上又好難怪股東咁憤怒，因為佢哋出資，好多人仲喺前兩年真金白銀供完股，但係為佢哋打工嗰幾位年年花紅都咁高，好難同一陣線。
余絲韻