絲絲講場：滙豐中小企中心開張 大玩LCD裝潢落足本
平時見人哋開舖都會舞吓獅、打吓鼓，滙豐尋日喺葵涌開中小企中心，絲絲梗係要去趁吓熱鬧，不過初時以為去工廠區，地方可能會係啲工廠大廈咁，點知去到見環境唔錯，呢個中小企中心嘅Lobby仲用晒LCD做柱身，連天花板都整埋，滙豐今次真係落足本。
今年開多6間
絲絲走去問吓滙豐工商業務主管陳樑才（Albert），佢鬼咁開心咁爆料話，呢間係滙豐第18間中小企中心，今年仲會開多6間，現有嘅其中6間亦會擴充，今年仲會落重本，投入7,500萬元搞大由佢負責嘅部門。
好戲永遠都喺後頭，正當絲絲吹水吹得興高采烈之際，真係唔可以唔佩服啲公關姐姐勁多諗頭，搵咗十幾人嚟舞龍，場面勁熱鬧，最估唔到係今次仲結合科技，由香港區總裁馬凱博邀請主禮嘉賓上台，一人拎一支棍，用LCD屏幕做銅鑼，由佢哋一齊敲響，最重要係配合埋舞龍，周圍嘅LCD屏幕有好多龍飛嚟飛去，呢種震撼真係冇得頂。
（余絲韻）