證監會行政總裁韋奕禮早前宣布提早離職，引起市場多番揣測，佢日前喺美國紐約親自揭開提早離職之謎，佢笑言其實只係希望有個假期，因為倫敦十月份嘅天氣開始好差，夏天返去，假期會好過啲！
韋奕禮喺九月一日會返英國上新工，佢趁住喺六月離開香港後嘅3個月空檔，可以享受一下歐洲嘅夏天。
佢早前曾講過，好似佢呢啲外來者（Outsider），可以話與業界冇聯繫包袱，較少受到外來影響，暗示搵外國人做佢嘅繼任人會較合適。佢仲大讚，由來自內地嘅李小加出任港交所（00388）行政總裁係極佳嘅決定。
提到港交所正面對全球交易所合併潮衝擊，佢就話港交所仲未有合適嘅購併機會，其增長潛力主要係「中國故事」，所以應該抓緊大陸嘅市場機遇，提升本身嘅市場基礎設施，而唔係削減開支，亦要加強與上海交易所嘅合作；相反，依家進行購併嘅交易所都係迫於市場競爭壓力，需尋求「強強聯手」節省營運成本。
港交所非執行董事、滙控（00005）非執行董事史美倫都話，由於上交所與深交所仍屬非股份制企業，上交所、深交所與港交所合併嘅建議能否落實，好睇國家未來嘅政策。全國政協委員張華峰就力促成立「大中華交易所」，由香港、深圳、上海、台灣一起組織聯合集資嘅平台，相信可吸引新興產業、礦產、石油企業前來上市。
（余絲韻）