絲絲講場：滙控化身火星人揀總部
大家都知滙控（00005）總部設喺倫敦，但主席范智廉竟然向傳媒講，話佢哋來自火星？原來今年滙控會重新審視總部設立地點，范智廉話呢個審視每隔3年一次，每次都要當自己從火星而降咁，正式評估邊處地方先最適合佢哋呢家國際金融機構。
定期審視 倫敦秤先
市場一直猜測滙控會唔會搬總部，加上之前范智廉公開話關注英國嘅銀行稅，可以帶來25億英鎊嘅額外支出，更加令傳言滿天飛。范智廉就解畫，話佢哋從來都冇講過會搬離倫敦，雖然有股東叫佢哋要考慮總部地點嘅支出及好處，但滙控覺得倫敦仍然喺最吸引嘅地方，因為倫敦喺外匯交易、基金服務等方面仍處於領導地位。
即使唔搬總部，滙控又會唔會喺其他地方上市呢？范智廉話滙控已經喺五地嘅交易所掛牌，相信覆蓋面都足夠，亦冇打算倣效渣打（02888）咁，以預託證券形式喺印度掛牌，不過如果以子公司形式發展，更有利進入印度市場嘅話，佢哋就會樂於採用喎。
余絲韻