絲絲講場：恒生訪運動員分享理財
絲絲一直都好佩服運動員嗰種熱誠、恒心，特別記得完咗冇耐嘅亞運會，喺單車場上跌低被單車輾過，仲堅持爬番起身繼續比賽嘅黃蘊瑤，絲絲就覺得最勁。勢估唔到佢兼顧事業之餘，仲可以分身去做理財計劃，為自己打算，完全唔似依家嘅「八十後」先使未來錢，甚至使凸。
恒生（00011）同絲絲一樣咁尊重運動員，佢哋除咗用獎金鼓勵之外，亦好鍾意搵佢哋分享理財心得。聽聞恒生喺一月開始做咗個「恒生財富管理服務」系列，搵咗「香港第一金」嘅李麗珊及東亞運金牌得主趙詠賢，分享做媽媽及老婆嘅理財策略，點樣可以做到「持家有道」。
專訪亞運猛將黃蘊瑤
絲絲八到，恒生喺本月搵到今次亞運最有鬥志、最具人氣嘅黃蘊瑤做專訪，下周一就出街，個訪問仲會講佢原來一早已做好準備，計劃用唔同嘅Financial Plans供完層樓，以及喺退役後到外國讀珠寶鑑證課程。佢呢兩個人生目標，都係好多香港人嘅目標，絲絲覺得大家可以跟佢學吓嘢，睇吓佢有乜嘢理財高見。
余絲韻