市場熱線：達進值得長線持有

美股結束3日跌勢回升，ADR再升過百點，卡達菲隨時倒台，股民準備定開香檳慶祝，恒指技術走勢有機會上試100日平均線23,470點兼補番個下跌裂口，不過恒指仍處於下降軌當中，上不破23,500點，下不穿22,400點，可能仍係上落市格局。而且利比亞之後，會輪到阿爾及利亞、也門同巴林，魚缸亦會跟住動盪。

恒指就話玩上落啫，二三線股畀人洗白白之後元氣大傷，有反彈冇上升，好似光匯（00933）、安芯（01149）呢類累積跌幅極大嘅股出現「死貓彈」亦正常，但望返家鄉就路途好遙遠。老古本來都有啲博反彈對象，原先諗住6蚊附近撈中國建築（03311），差少少未能完成目標。另金飾股話今年銷售增長超過三成，六福（00590）上周四跌穿20蚊都幾吸引，但當日殺聲震天嚇到膽破，結果中建築同六福上周五分別升逾7%。

今日大笨象（00005）同金錢龜（00011）齊齊派成績表，周末又開兩會，通常祖國開親大會都有利魚缸，溫總尋日同網民對話時，拍心口話會提高個人稅薪酬起徵點，照計會有利內需股，但內需股呢排跌得好傷，尤其體育用品股連死貓彈都冇力，都係避之則吉為妙。

兔年第一股跟勢炒

另外，兔年第一股，中國三三傳媒（08087）以全配售形式上市，今日正式登場。三三傳媒挾着中國高鐵網絡媒體供應商旗幟，已有一定叫座力，聞說頭五大長線基金獲五成配額，貨源歸邊，不妨順勢跟進。

呢排係業績期，睇成績表唔懶得，真明麗（01868）舊年竟然賺少34%，主要係成本拖累，當初間公司率先發展LED照明仲自己造埋芯片，估唔到被對手遲來先上岸。其實舊年尾內地3部委LED照明產品示範工程招標，得雷士（02222）同達進精電（00515）入圍，對真明麗嘅信心已大打折扣。至於雷士同達進股價一直都幾硬淨，達進更喺上月完成批股集資用來大搞LED街燈項目，批股後股價表現其實唔差，但呢次二三線洗倉潮幾乎無一幸免，佢股價低見3.22元，上周五回升至3.39元收市。

達進能夠中標祖國嘅示範工程，證明公司街燈技術有番咁上下，管理層話舊年路燈定單已達1.2億人仔，剛啱又攞到江蘇邗江6,000萬人仔路燈合約，今年同出年嘅定單目標分別係5億同7億人仔。呢排油價係咁升，節能產品需求會愈來愈大，祖國每年換街燈要3,000萬支以上，達進呢類公司嘅增長空間其實好大，值得收集揸中長線。

戰報

福山能源（00639）+13%

古勝本月十五日推介福山能源，上周五大幅抽升至5.8元，跟佢喺低位5.13元上車，賺超過13%。

國際精密（00929）+21%

古晨本月十四日吼中隻國際精密，上周五以大陽燭抽上全日高位1.77元，勁升逾21%，認真厲害。

古勝