為咗令樓市降溫，內地政府喺呢兩年非常積極，就好似踏入新一年冇幾耐，絲絲眼見中央出招真係冇停手，呢頭推出房產稅，嗰頭就嚟一招「國八條」，之後就十幾個城市開始限購，令到成交想唔縮都難，發展商就梗係閉翳喇！
喺唔想減價，但又想賣到樓嘅情況下，發展商只好諗吓計。絲絲睇到內地媒體《每日經濟新聞》話，上海綠地喺上海嘅一個樓盤，就推出咗買房即送5年房產稅嘅優惠。報道話，呢個樓盤所送嘅房產稅，都係按全部200平方米嘅面積計算，稅率就按0.6%計，5年嘅房產稅稅額，等同於樓價總額優惠咗十幾萬人仔。
其實呢種做法，只係一啲變相減價促銷嘅手法，所謂買樓送房產稅，其實只係唔想畀人覺得咁隨便就話要減價賣樓啫。
（余絲韻）