銀行界馬拉松發燒友名單之中，恒生銀行（00011）助理總經理兼傳訊及企業責任主管張樹槐（Walter）一定上榜，佢話：「我覺得最美就係跑步嘅時候死。」可知佢對於跑步幾咁發燒！
話晒依家新正頭，點解講埋啲咁唔吉利嘅說話？Walter話人有多好種死法，可能係患癌症死，又可能瞓覺時死，既然咁鍾意跑步，死喺跑道上都叫做適得其所。不過絲絲上周先與Walter食晚飯，見到佢身形仍然相當Fit，相信佢嘅馬拉松之路仍然相當漫長。
當初家人朋友知道Walter要參加馬拉松，都嚇咗一跳，皆因佢自小與運動絕緣，中一學校賽跑包尾；至今佢嘅最佳成績係3小時47分完成馬拉松，有咁大轉變，佢話要多謝神以及一個人。呢個人係佢嘅同事兼師傅楊子江，不但教佢跑步技巧、借參考書，首次跑馬拉松時仲專誠到終點等佢影相。依家Walter每個周末朝早都會約跑友跑步，風雨不改；至於神就唔使多介紹喇，有信仰嘅Walter跑步時習慣默唱詩歌，四周無人時更會高呼「哈利路亞」，感覺與上帝更接近。
Walter仲好好心機，預備兩個文件夾收藏每一次比賽嘅號碼布及證書，連秘書都畀佢感染，開始參加半馬比賽。Walter講笑話，因為跑得馬拉松嘅人都好有要求，所以佢啲下屬其實都幾唔好彩，成日畀佢Push要有進步。
余絲韻