市場熱線：中遠國際攻守兼備

港股兔年飛來3隻大烏鴉，13個交易日跌咗10日，老美就連升7日，但執筆時標普期指跌緊，連升走勢有機會斷纜，由於呢排老美嘅經濟數據實在太過靚仔，所以利率期貨一面倒睇年尾會加息，年中推QE3機會變細，甚至QE2嘅晒士亦可能要縮，所謂出嚟行、遲早要還，印完銀紙再收番都幾痛苦。

內地仍有加息可能

祖國加息就義無反顧，唔係加完就無後顧之憂，A股紅盤低開，滬綜指收市跌25點，但比起港股已算精壯。今次加息有明顯差別，存款利率加得多過貸款，而3個月定期加0.35%，6個月定期加0.3%，1年加0.25%，計落新開3個月定期較着數，博埋短期再加息。

大笨象（00005）單天保至尊，保險股話加息有着數，但國壽（02628）先升後跌穿埋30蚊關口，證明大戶派貨畀你都唔慌有得執。尋日跌得好全面，內房股唔使問係重災區，上升股得154隻，下跌股達916隻，好多股友頂唔住要沽貨，強勢股都冇情講，前日保利協鑫（03800）失守，尋日輪到比亞迪電子（00285），但數碼通（00315）回馬槍創埋新高，中港電訊股係近期逆市奇葩，祖國移動（00941）係例外，但如果再跌穿70蚊，老古會有例飛捧場，因淨係收息都有4厘。

依家平貨通街都係，有現金未必係pain，老古嘅分段吸納計劃要稍為推遲，穿咗二萬三嘅話，下一站睇舊年尾低位22,400點，唔心急嘅話，睇埋公司全年成績表再揀蟀。今日有思捷（00330）同宏利（00945）派成績表，兩間公司都係做鬼佬生意，而宏利股價跟美股多過跟港股，所以呢排都幾標青。

若然公司揸現金多，依家亦有好多收購選擇，好似中遠國際（00517），甩隻遠地（03377）算係好價，套現咗52億銀，計落每股現金值都超過4蚊，所以呢排股價都幾硬淨，揸咁多現金有3個選擇——a：做守財奴；b：當股息派畀股東；c：買嘢。a係最差選擇，b係無辦法之中嘅辦法，但中遠國際阿媽係百足咁多爪嘅中遠集團，要買嘢有大把貨品揀，注資只係遲早問題。

憧憬注入燃油業務

中遠國際現時業務包括塗料產品、船舶設備及備件、船舶貿易代理等，傳聞斟緊注資嘅業務亦同航運有關，為船舶燃油供應項目。母公司的有關業務遍布內地各主要港口及新加坡等地，擁有各類供油供水船舶96艘、15座儲油庫總容量達82萬立方米、以及油碼頭和火車裝卸等設備。

講開航運，波羅的海指數曾經跌到接近1,000點至有少少反彈，原因係太多新船落水影響運價，但對周邊行業來講反而增加需求，中遠國際屬進可攻、退可守格局，不過依家市況下亦不宜太進取。

戰報

意馬國際（00585）+18%

帥哥周二睇中隻意馬，尋日成為逆市奇葩，高位升至0.425元，較推介日低位0.36元，升18%。

盈信控股（00015）+10%

古晨周二推介盈信，當日低位只係1.15元，尋日升至1.26元高位，跟佢買貨，兩日就賺近10%。

古勝