早兩日絲絲與上實（00363）嘅老友食飯，講到依家百物騰貴，都係揸住啲升緊值嘅「人仔」最安心，上實常務副行政總裁周杰就好大反應咁話，佢喺○二年由上海調嚟香港做嘢時，大概係80幾蚊港紙兌100蚊人仔，但今時唔同往日，中國經濟騰飛，家陣人仔升咗咁多，其實等於人工變相少咗。不過佢都笑笑口話好彩佢哋年年有人工加，都追到通脹，今年亦唔例外。
佢哋嘅發言人馮啟明亦話，依家為咗保值，佢已向自己儲開錢嘅銀行設定指令，一有港元入帳就會隨時自動兌換為人民幣，咁就唔怕港元貶值啦。絲絲都忍唔住問佢哋，其實啲中資業務喺晒內地，賺嘅好多時係人民幣，如果出糧都用埋人仔，咁咪唔使煩囉！周總就話咁樣又涉及人民幣出境等嘅一啲技術問題，加上佢哋喺香港好多費用都要以港元支付，所以都係用港元方便啲喎。
余絲韻