絲絲講場：會見奧巴馬中投有搞作？
中國國家主席胡錦濤喺上星期訪美，有唔少中國企業嘅「揸Fit人」同行，拜會美國總統奧巴馬，包括第一代「走出去」、收購美國IBM嘅聯想集團（00992）董事長柳傳志，佢尋日大爆中投公司董事長樓繼偉亦有份見奧巴馬，大家仲傾吓中國喺美國嘅投資，但奇怪在中投公司發言人對於兩人會面嘅事不願置評，唔通佢哋傾成大生意所以煞有介事？
柳傳志爆料傾基建
會議上有4位中國企業嘅「揸Fit人」與14位美國企業嘅CEO，當中柳傳志話奧巴馬好歡迎佢哋喺美國投資，而樓繼偉亦話有興趣，仲傾吓中國喺美國基建項目上嘅投資，但中投就拒絕評論。絲絲聽朋友講，中投與美國關係非常好，去年已收購咗美國發電及輸電企業部分權益。
身為第一代「走出去」嘅企業舵手，柳傳志就預測將會有唔少中國企業喺美國發展，又話中國企業「走出去」係出於業務需要，同時係中國企業嘅進化，佢仲話聯想正考慮收購一家美國醫療儀器公司及投資於酒店餐飲業，諗住喺美國大展拳腳，佢話睇好美國嘅前景喎。
余絲韻