月收十萬份多錯漏
原來宏利一日閒閒地收到九千封有關強積金嘅信件，所有信件都會喺二十四小時內做好掃描分類等工作，方便往後跟進處理。Luzia話，已請咗四十個員工專責處理文件，但仍要經常聘兼職幫手先可以依時搞掂。
嗰度嘅員工同絲絲講，話每個月都收到逾十萬份文件，寄件人忙中有錯好難避免，填漏嘢、冇簽名、污漬一笪笪已經係司空見慣，佢哋曾經收過未填過嘅空白表格，前幾日仲有個失魂僱主，誤將支票嘅彩色影印本寄畀佢哋。
睇見一箱箱文件堆積如山，Luzia話其實有八成業界已準備好使用統一嘅電子平台，佢都希望可以快啲推出。又係嘅，電子平台可以幫業界節省成本，又可為環保出一分力，點解唔快啲落實呢？
余絲韻