絲絲講場：趙國雄搞Gag冇悶場
上市公司嘅業績會，由於主持人要宣讀一大堆與業績相關嘅會計數字，所以一般都會比較沉悶，不過喺多間上市公司擔任董事、富有表演欲嘅趙國雄，就能夠將沉悶嘅業績會變得有聲有色。
兩父女輕鬆主持大局
話說尋日由長實（00001）分拆出嚟嘅置富產業信託（00778）舉行業績會，身為信託管理公司主席嘅趙國雄，喺業績會開始之前經已緩和氣氛，佢話會場內嘅小食及飲品已經畀晒錢，叫記者快啲食唔好嘥。
當有人問喺農曆新年期間，置富旗下商場有乜嘢推廣活動嘅時候，一向對答如流嘅趙國雄突然停咗兩秒唔出聲，然後講笑咁話：「應該唔使我出嚟唱歌，我哋應該仲有Budget（預算）。」引嚟全場笑聲，然後佢就交個波畀個女Justina，即係置富資產管理副行政總裁趙宇去回答呢條問題。趙宇睇見爸爸喺業績會上搞Gag，亦有向在場記者做個鬼臉，睇嚟佢哋兩父女拍住上，喺置富入面做得幾開心。
對於好多人都關心嘅問題──長實嘅首隻人民幣房地產信託基金幾時上市？趙國雄話基於上市規則，個人唔方便作任何透露，但喺合適時候一定會公布。
余絲韻