絲絲講場:濱海鎰泰開張毛玉萍撐場
香港嘅證券經紀業務愈嚟愈熱鬧，尋日濱海鎰泰證券大搞開幕典禮，絲絲有幸出席，見到好多城中名人，乜嘢界別都有，金融界就更加唔在講，最開心係見到久未露面嘅毛玉萍，以及演藝界都有嘉賓到場，可見濱海鎰泰老闆兼主席田琬善幾咁交遊廣闊。
朱太李君豪等到賀
絲絲見到近期好紅嘅金利豐集團董事總經理朱李月華、「詠春高手」冼國林、旭日國際嘅蔡志明父子、影視名人「三哥」苗喬偉、藝人黃伊汶、港交所（00388）董事李君豪等，個個賓客滿場飛，搞到個場鬼咁熱鬧。
濱海鎰泰證券前身係駿溢證券，田琬善全數收購咗仲改埋名。濱海新區喺天津東部沿海地區，顧問思義，濱海鎰泰會集中服務天津及上海呢啲富裕地區嘅高端客戶。未來濱海鎰泰主要服務係提供股票包銷、可換股債券存倉、港股買賣等證券服務，亦會有企業融資、公司貸款及收購合併呢類型嘅顧問服務。
力爭投資移民客戶
濱海鎰泰董事韓銘生話，公司希望首年內喺投資移民方面爭取3%嘅市佔率，好多內地富豪已有資產喺香港，希望爭取佢哋成為客戶，公司會把握機會與一啲內地嘅大型企業合作，例如向商務旅行團介紹公司咁。佢又話希望可以喺2至3年後上市，增加客戶嘅信心，根據上市規則，公司要連續兩年實現正現金流先符合上市資格。
（余絲韻）