絲絲講場：產品失蹤疑雲 中綠解畫
中國綠色食品（00904）日前被美銀美林話，喺內地部分超市搵唔到佢哋嘅主力產品「玉米乳」系列，股價周四即下跌6%。尋日中綠停牌兼解畫，話只係品牌整合，有新系列飲品取替「玉米乳」，公司CFO黃康傑話今後會加強與證券界溝通喎。
重整飲料品牌
中綠話「玉米乳」產品喺內地超市銷售達1.3億元人仔，但因要重整品牌，將果蔬汁及甜玉米飲料分類，取代原有嘅「玉米乳」，所以喺內地超市搵唔到「玉米乳」，而喺廈門航空、浙江及上海嘅餐廳就仍可搵到。
中綠喺去年八月曾因為推遲公布業績，並臨時取消分析員簡報會，引起市場恐慌，當時又係美銀美林出報告，話佢哋嘅分析員諗住出席該公司業務簡報會議，但活動已取消，又未能接觸中綠食品嘅管理層。今次中綠CFO話會努力與各界溝通，提高透明度，希望佢哋快啲做得到啦。
余絲韻