絲絲講場：FB愛聘Google夥計
Facebook（FB）部署上市嘅消息鬧得熱哄哄，IT界亦都非常關注FB喺香港成立分公司嘅籌備計劃，FB尋日與和電香港（00215）旗下3香港合作推出服務，FB嘅北亞地區總監梁幼莓（Jayne Leung）首次公開露面，早前加入FB嘅佢原來亦係出身於Google，果真體現咗FB愛聘Google前員工嘅「傳統」！
IT界友好告知，FB喺香港嘅Office最快於一、兩個月內正式開張，可能FB美國總部仲未公布，Jayne尋日刻意保持低調。據絲絲所知，Jayne加入FB前曾出任Google網絡廣告部門嘅亞洲業務主管，而FB籌備中嘅香港Office另一位銷售董事Nicole Chou，原來亦係Jayne喺Google嘅舊同事。
FB特別鍾意請Google前員工其實有迹可尋，美國嘅IT傳媒就曾經做過一個統計，發現FB旗下1,700名員工中，至少有142人逗過Google人工，當中包括FB前財監Gideon Yu，相信係與創辦人朱克伯格認定FB嘅發展模式與Google如出一轍有關。
夥3香港推新服務
講番FB與3香港合作推出嘅新服務，主要透過由FB開發以J2ME平台為核心嘅FB應用程式，令普通3G電話都可與iPhone等智能電話一樣，輕易咁隨街使用FB。3香港內容管理主管何偉榮話，3香港係世界首批與FB合作引入有關服務嘅手機網絡，此舉將有助年齡較成熟嘅用家透過手機使用FB服務。唔講唔知，以全球計原來有多達30%嘅FB使用者係透過手機使用FB，前景確係不容忽視。
余絲韻