絲絲講場：友邦為綠色音樂會「叉電」
前日絲絲撞見友邦保險（AIA）（01299）嘅老友，見佢神色匆匆，當然要問吓佢搞乜，佢就話趕住去「叉電」，雖然好多人計劃喺農曆新年休息吓、叉吓電，但點解會搞到身水身汗？
員工踩單車儲電
原來佢係趕住去踩單車「叉電」，事關AIA聯同十幾間企業及學校嘅隊伍，分別利用原地踩單車所產生嘅動力，幫東華三院即將舉行嘅音樂會儲電，實現零碳排放嘅綠色音樂會，今次活動喺香港可謂史無前例。
唔講唔知，一個音樂會要花約40kw/h嘅用電量，AIA就派咗10個員工參加今次嘅「儲電大行動」，輪流踩5部單車；老友仲話，今次終於親身體驗到平時用嘅每一度電，都要付出無數汗水先產生，希望大家要珍惜能源喎。
為善除咗出力，最實際當然係出錢，AIA透過今次活動，捐錢畀東華三院嘅獎助學金計劃，幫啲成績優異但家境清貧嘅學生升讀大學，呢種出錢出力嘅精神真係值得嘉許。
余絲韻