「汽車狂人」李書福收購富豪汽車（Volvo）後，各界一直關注Volvo喺內地建廠嘅計劃，喺內地建廠原來唔單止為咗拓展內地市場咁簡單，Volvo行政總裁Stefan Jacoby露咗口風，原來係為咗減輕匯率風險，日後或會將內地生產嘅Volvo出口到美國，改變現時全靠以歐洲廠房產品輸美嘅做法。
吉汽（00175）母公司吉控買起Volvo，一直強調會維持Volvo作為瑞典汽車嘅傳統，所以Volvo考慮以內地生產線作為佢哋輸美車款生產基地確係令人有啲意外，不過據《華爾街日報》引述Jacoby話，公司有呢個考慮主要係由於美元兌歐元偏弱，直接影響Volvo輸美車款嘅邊際利潤及競爭力，雖然以內地作為輸美車款生產基地亦唔能夠完全化解匯率風險，但由於人民幣與美元匯價仍相對穩定，加上生產成本亦相對較低，可以幫到控制成本。
如果Jacoby所講嘅未來真係成事，幾乎肯定會成為內地生產汽車輸入美國嘅里程碑。不過報道又引述知情人士話，除咗Jacoby話「以內地作為輸美車款生產基地」嘅方案外，Volvo其實亦正研究直接到美國設廠生產嘅可能性，所以話呢個里程碑係咪豎立到，仲有好多變數。
余絲韻