財技了得嘅關百豪係時富金融（00510）嘅Icon，公司又有新搞作，就係將旗下家品店實惠分拆上市。時富與實惠嘅關係可以話係兜兜轉轉，有種合久必分嘅感覺。
絲絲記得，實惠原本由林志誠喺八六年創立，當時專做中檔次嘅傢俬生意，到九四年林志誠更將實惠（股份代號00996、現稱東方銀座）上市，佢喺○○年引入關百豪做主要股東，其後時富透過換股方式收購實惠，關百豪再透過時富投資（01049）收購實惠嘅零售業務，然後將個殼賣出套現；○八年時富投資又向時富金融出售從事「實惠」品牌嘅零售業務，如今再將之分拆上市，足見關百豪嘅財技了得。
時富金融及時富投資呢兩隻孖寶喺去年開始動作多多，絲絲讀金融課時所學嘅企業行動例子，佢哋都做咗大部分，包括出售金融業務（已終止）、洽購網上業務、拆細股份、股東減持、配股集資以及改公司Logo，又試過股價單日大瀉，估唔到今年開始冇耐就有新搞作。時富金融話分拆實惠上市嘅計劃已經搵咗保薦人，主席關百豪話，分拆係希望進一步提升公司嘅品牌價值及促進購併，加快內地發展，公司未來5年嘅發展重點將放眼中國。
余絲韻