中移（00941）與iPhone嘅合作，講咗一段好長嘅時間，最初話要將iPhone引入大陸嘅係董事長王建宙，但至今都係只聞樓梯響。據內地媒體講，中移首席執行官李躍對呢件事一直比較在意，聽講佢甚至喺公司嘅內部講話中，拒絕使用iPhone一詞，而改用「很知名的一家公司的第一部手機」嚟代稱。
李躍又提到，明顯感覺到中移與其他公司嘅合作中，受到重視有餘，但獲得嘅尊重就不足。佢話中移成為一個巨無霸已經係事實，所有合作夥伴冇乜邊個唔重視中移，但佢哋嘅合作夥伴亦有與微軟、Google及蘋果公司合作，而對蘋果公司、微軟等嘅態度，相比對中移嘅態度係有差異。絲絲感覺到李總好似係有感而發咁，更加感覺到佢身上流緊係中移嘅血。
近日內地媒體有報道話，中移旗下嘅成都移動喺當地報紙上打廣告開賣iPhone 4，絲絲見到眼都突埋，要知道依家內地嘅三大電訊商中，只有聯通（00762）正式喺內地賣iPhone，若果中移真係可以正式開賣iPhone，點會唔打鑼打鼓公布呢？結果當然係冇下文啦，中移方面亦都向內地媒體話尚未與蘋果公司達成協議。
余絲韻