台灣一向都好重視年終尾禡，淨係睇場面就知道公司賺得多唔多。前兩年因為金融海嘯及風災而冇搞到大型尾禡宴嘅富邦金控，去年賺到盆滿缽滿，公司決定今年搞大佢，呢場尾禡宴仲筵開1,400圍，即係有近17,000人入座，真係夠晒誇張。
依家富邦金控嘅另一個代名詞就係「獲利王」，威盡同行，估計佢哋去年純利超過250億新台幣，係公司成立以嚟賺得最多嘅一年。董事長蔡明忠漏咗口風，話今年嘅年終獎金一定多過去年，業績最好嘅員工甚至「冇上限」添。
就喺本周末晚，富邦金控會喺台北南港展覽館擺1,400圍，仲搵到五星級飯店主廚打造呢場精緻嘅尾禡宴，無論係圍數及人數都破晒紀錄。為咗慰勞夥計，到時唔單只有抽獎，仲請咗神秘嘉賓表演添，以前富邦搵過蔡依林、蔡琴、費玉清等歌手表演，今年請嘅嘉賓一定都係重量級喇。
余絲韻