絲絲講場：阿松陪囡囡備戰冇假放
黑石集團（香港）主席梁錦松與老婆伏明霞出咗名夫妻恩愛，一家人樂也融融，嚟緊放聖誕假及元旦，阿松話佢冇假放，因為要幫囡囡溫書，備戰考試。
黑石高手駐港掌私募
阿松喺黑石嘅工作好忙，佢哋集團最近由紐約派咗個高管Michael Chae嚟香港坐鎮，阿松話Michael Chae將主要負責亞洲私募基金業務，亦都係合夥人，而阿松就負責睇大中華區嘅房地產、對沖基金及財務顧問等業務喎。多咗個高手坐鎮香港，阿松應該可以輕鬆啲。
不過佢嘅「私人業務」都好多，佢份人好親力親為，所以會親自睇實囡囡嘅學業進度。講起仔女，阿松成個慈父樣出晒嚟，今年嘅聖誕長假期佢只係放紅色假，亦都唔會出去玩，事關囡囡放完聖誕假後就要考試，身為廿四孝老竇嘅佢惟有留喺屋企陪囡囡備戰，有個咁出類拔萃嘅老竇教路，佢嘅囡囡成績肯定一日千里啦。
除咗黑石之外，阿松亦係國際小母牛香港分會嘅主席，小母牛每次搞活動，都見到阿松一家幾口一齊出席，既可以做善事，又可以過Family day。早前佢就與太太伏明霞、大女Amy及二仔Edward參加競步善行；又試過兩公婆遠赴河北探訪，親身體驗貧困農村嘅生活。
余絲韻