筆者早前曾經寫過──「英皇本色，三雄出擊」，今日又講一講英皇國際（00163），早前大家有留意，知道佢同個仔英皇酒店（00296）雙雙「暫停又開始過」，後來知道原來英皇國際想將英皇酒店嘅上海城項目轉番落阿媽度。咁樣自自然就有一個理論價值出咗嚟，令大家近期頭都大埋。
根據筆者研究，之前個協議係5股英皇酒店獲派1股英皇國際，協定價為4.11元，之後修訂新嘅補充條款，就係20股英皇酒店獲派7股英皇國際，協定價定為2.35元。
經條款修改過，將佢哋嘅市場股價計埋落去，對揸住英皇酒店股東嚟講，自然就係多少少吸引力，對英皇酒店嘅忠實粉絲喺某程度上係一種支持同回報。
從英皇國際嚟講，短期企業重組確係為佢哋造成一定程度上影響，但係大家諗深一層，阿仔將上海項目轉番落阿媽度，兩母子喺各自世界大顯神通，阿媽嘅大中華主要地產商定位就更加精準。阿仔就可以將澳門概念股嘅形象同時繼續深化，又唔使為咗背負呢個項目影響佢嘅表現。
加上最終阿仔亦都因為阿媽嘅策略管理同往後執行發展而「子憑母貴」。正所謂「環環相扣，母子同心」，梗係希望感動一眾股東同Fans，以條款所定，2.35元會成為呢個大項目嘅「真實價位」，依家1.9元左右，睇吓往後發展，各粉絲攞唔攞到呢一份一一年小禮物，同老友共享成果啦！
香港大學電子金融服務榮譽助理教授 徐燦傑