新地(00016)一向重視家庭及教育係人都知,對公司內部亦都顧及員工福祉。絲絲尋日收到張陣容鼎盛嘅大合照,原來係新地副主席兼董事總經理郭炳聯與胞妹兼郭氏基金會執董郭婉儀,頒授獎學金畀集團員工嘅子女。
新地特別喺今年創立「新地集團員工子女本科獎學金」,為員工子女提供全期大學本科教育費資助,今年共有8名來自集團不同部門及附屬公司嘅員工子女獲獎學金,絲絲睇到獲頒獎學金嘅員工子女喺儀式上,接過集團統帥郭炳聯嘅嘉許均喜上眉梢。雖然尋日天氣好凍,但絲絲仍感覺到佢哋嘅溫暖。
郭炳聯同絲絲講,人才係公司發展嘅基石,推動集團發展除咗要關心員工個人,更希望佢哋嘅下一代學有所成,成為香港未來棟樑。呢個獎學金係畀服務最少5年嘅新地員工之子女參與,資格係須於香港或內地大學修讀全日制學士學位課程,然後考慮佢哋嘅成績、發展表現及家庭財政狀況作出評估。
余絲韻