市場熱線：中建材吼位買貨

散戶未見踴躍沽貨

尋日仲未似係「終極一跌」，兩日都係陰陰濕濕下晝先郁手，成交雖然增加到762億元，但散戶沽貨意欲唔大，等住慢慢陰乾，期指再低水116點，而且已經完全唔理外圍。

尋日跌得好全面，上升股唔夠200隻，下跌股則達858隻，悲觀情緒逐漸蔓延到細價股，連一向最硬淨嘅零售股亦頂唔順，跌市買公用股呢支歌仔都冇得唱，包括出年加電費嘅兩個電燈膽（中電00002及港燈00006）在內。

最激氣係隻祖國移動（00941），你當佢係公用股咩，升市佢又跌，跌市佢又跌，依家已挨近250日平均線（75.93元），買來收息都可一諗，但佢競爭對手二奶電話（00762）卻非常硬淨。

祖國雖然實施價格管制，但五糧液同茅台「逆市」加價，原因係呢類酒愈貴愈多人買，賣嘅係價錢而非品質。代理五糧液嘅銀基（00886）仍係呢排較硬淨嘅股份，白酒加價有時都會帶挈埋紅酒股，但紅酒股主要面對入口競爭，同奶粉一樣，半壁江山畀來路貨佔據，唔似白酒咁一定係土炮。

中遠國際（00517）終於賣得甩遠地（03377），而且有溢價超過10%算唔錯，所以隻股尋日已有「春江鴨」預先炒高近5%。

中遠國際今次套現53.2億元，而佢尋日市值亦只係70億元，如果將啲錢用嚟派特別息就皆大歡喜。至於邊個接貨則未知，但散戶肯定唔會用溢價接貨。其實無論房地產商抑或用家炒家，對出年樓市仍然係幾睇好，投地亦好踴躍。內房股呢排只係微跌，但明顯跑贏大市，古勝繼續建議趁低吸納。

需求增利水泥價格

不過，其他股仍係處於弱勢，在下自從10日前已話過唔會心急入市，至於估計呢個月股市會先低後高，靈唔靈就睇下個禮拜可否轉勢，但總之唔好擒青。

水泥股原本都升得好靚，但尋日亦見個別獲利回吐。水泥股上升係有基本因素支持，因為限電又限產，令到水泥價格創新高，而且祖國未來起咁多保障房，搞埋建材下鄉同埋西部、新疆大開發，呢個板塊仍有作為。

兩隻龍頭股：海螺水泥（00914）同中國建材（03323）近期走勢比較，以前者表現較好，原因係中建材被H股大股東摩根大通連續4次減持，摩通仍揸住21.76%即係3.13億股，如果一路減持豈非有排唔使升？但摩通一向作為佢長期粉絲，經常減持完又增持，未必係睇淡。中建材預測市盈率只係14倍，絕對唔算貴，吼佢跌到17蚊樓下入得過。

戰報

中國油氣（00702）+7%

古晨周三指中國油氣或有後着，當日低位0.45元，昨日以全日高位0.485元收市，累升7.7%。

世達科技（01282）+9%

帥哥尋日指世達貨乾易炒，昨日有異動，股價高見1.06元，以低位0.97元計，單日升幅逾9%。

古勝