絲絲講場：梁兆基鍾情黃金人仔
尋日絲絲見到星展香港經濟研究部高級經濟師梁兆基（Chris）春風滿面，原來佢回味緊喺年初時，估中咗今年內地央行會加息；既然佢預測咁準，投資應該有唔少斬獲，點知Chris話佢咁大個仔都未試過炒股及買樓。
買金對抗美元貶值
原來Chris奉行基本因素分析，佢話現時世界嘅經濟亂局，諗唔到有乜辦法可解決，所以唔想違背理論咁投資，佢住緊間屋都係老竇買落。Chris話佢嘅投資好簡單，只係買黃金及換人仔，佢仲話其實對金價冇乜研究，根本唔知會升定跌，買金只為咗對抗美元貶值，佢之前喺金價1,300元時開始買入。
喺買金之前，Chris就每日兌2萬蚊人仔，直到戶口嘅港紙剛足夠日常生活所需。既然佢睇好人民幣，近年人債又咁Hit，唔知又有冇買番啲呢？佢就話：「冇喎，要填表申報好麻煩。」睇嚟Chris嘅投資心法真係簡單直接。
余絲韻