香港係國際金融中心，負責監管嘅機構好多時成為參觀、交流嘅對象，好似全國政協經濟委員會訪問團喺本周就嚟咗香港，進行一連4日嘅訪問，期間見過唔少機構，好似金管局、港交所（00388）及中華總商會等，了解吓香港嘅金融發展以及人民幣國際化等事宜。
尋日佢哋去咗港交所，港交所主席夏佳理亦非常重視，親自會見訪問團。全國政協經濟委員會來頭唔細，隸屬國務院，有一定嘅影響力，委員會成員個個名字亦響噹噹。今次訪問團一行14人來港，成員包括全國政協經濟委員會主任張左己，佢哋之後會順道去澳門，了解吓當地嘅發展情況。澳門依家發展一日千里，趁今次行程到訪當地亦係正常之舉。
近期榮升老竇嘅恒基（00012）大少李家傑亦係全國政協經濟委員會副主任，絲絲聽聞今次訪問團來港，亦有到恒基拜訪呢！
余絲韻