騰訊（00700）旗下QQ與防毒軟件公司360之間嘅爭執搞到滿城風雨，正所謂「鷸蚌相爭，漁人得利」，據講好多人就係因為嫌麻煩，去咗登記玩MSN，有指每日登記MSN嘅人，由以往一般每日幾萬個新用戶，急增至數以百萬計，多咗成100倍！
「QQ360」之戰始於差唔多兩個月前，話說360話QQ侵犯私隱，出咗隻軟件防止呢啲事件，騰訊梗係嬲喇，話停止用緊360嘅用戶玩QQ，360亦直情叫人唔好用QQ，咁樣搞法，就益晒MSN呢類即時通訊軟件多咗人登記。
以騰訊嘅規模，呢啲事搞到咁大始終唔係咁好，好似佢哋賣一隻遊戲嘅虛擬武器咁，已經賺咗20億美元，騰訊亦可以拎呢啲本錢去海外做收購，例如喺美國或韓國買遊戲編寫公司，科技公司真係可以點石成金！
余絲韻