市場熱線：一拖可保持升勢

不過，歐美市場反應尚算冷靜，Ambac單嘢之前已有風聲，至於愛爾蘭應該可以學希臘化險為夷，大不了歐洲央行又開行印鈔機幫手買債，總之有排未驚過。

嚴陣以待「通脹怪獸」

反而，本地地主輪流抽水就引起○七年驚魂，地主股尋日喺藍籌跌幅榜墊晒底，但大笨象（00005）喺11點前後挾上兩蚊令人嘆為觀止，恒指差1點就倒升，但跟住開始冇料到，6連升之後回吐1%只係濕濕碎，揸貨者傾向繼續觀望。

執筆時美匯回落到77樓下，但都係QE2前嘅反覆格局，奇在金價隔晚已衝破1,400美金新高，唔單止金股勁升，金舖股亦升極都有，古勝行過金舖的確見人山人海，前幾年金價初升時人人趕住沽金，依家又紛紛買金保值。

滬綜指同樣有回吐，但亦係正常調整，今日有外貿數據公布，繼續回落係意料中事。「通脹怪獸」係全民大敵，有內地傳媒做過統計，上海家樂福賣嘅各樣日用品價錢都貴過香港嘅超市，多個省市出現柴油荒，棉花、大麥、金銀銅鐵及人工樣樣加，所以祖國年尾唔加息都會加存款準備金。

下一輪炒乜板塊呢？炒加息可以買保險股，石油股同煤炭股係長青選擇，內需股雖然係「十二五」未來5年主力催谷，但炒到30倍PE開始有阻力，尤其係一條步行街同一牌子有3間嘅體育用品股。

安踏（02020）較高位回落18%，公司啱啱公布出年第二季訂貨會金額同比增長21%，而產品售價有高單位數字增長，主要係棉花價格上升，而且係連續7日破頂，女士嘅買衫支出肯定上漲。

有估計成衣價格未來會漲三成，而瑞信估本港樓價亦升三成，聽到人心寒，在下覺得係危言聳聽居多，當「超級通脹」來臨，老美自然會緊縮銀根自保。

農業機械需求殷切

「長青股」當中，第一拖拉機（00038）係其一，古勝亦不時作推介，隻股今年下半年亦以「樓梯級」式上升（升一輪，抖一抖，再升過），由4蚊升到8蚊樓上足足一個開，冇令大家失望。展望未來，農產品價格繼續上升，間接帶動農業機械銷售，全年成績表可以睇好。

依家祖國人力成本上漲，變相刺激農機需求，一拖嘅估值不斷提高，依家一○年預測PE 15倍，好難講仲有幾多水位，揸住呢隻股不妨任佢「放紙鳶」，農業概念股始終食住條水，又有發A股概念，仍然可以捧場。

戰報

蒙古投資（00402）+12%

高仁上周三指蒙古投資值得憧憬，股價昨一度高見0.216元，較推介當日低位累升近12%。

佳兆業（01638）+8%

桃桃昨日推介佳兆業逆市逞強，並一度高見2.01元，以低位1.85元計，單日升幅8.6%。

古勝