標準人壽即將有新嘅香港行政總裁，佢就係原本嘅首席銷售總監羅伊（Roy），絲絲當然要恭喜吓佢，阿Roy話仲要等埋保監嘅批准先正式上任，不過佢仲有另一單更開心嘅消息宣布。
原來標準人壽喺上半年交出好成績，佢哋公司Ｃ類別投資相連保險市場份額，比去年同期升咗一倍，約有百分之四點四，而投連險年度化保費按年更大升超過一點八倍，市場排名由十三位升至第八位，阿Roy形容係雙喜臨門。
阿Roy仲透露宏願，話希望未來數年能將市場份額提升一倍，成為市場首五位投連險產品供應商，絲絲喺度預祝佢願望成真啦！
嚟緊要面對咁大挑戰，阿Roy已經叉夠電，佢剛啱先喺蘇格蘭老家放假返嚟，絲絲問佢適唔適應香港嘅天氣突然轉涼呢？點知佢話相對已經落雪嘅蘇格蘭，香港天氣成日都好似夏天咁和暖，佢好鬼鍾意喎。講到令今年香港天氣反常嘅「拉尼娜」現象，佢就一啲都冇有怕，話最多係着多兩件衫啫。
余絲韻