期指觀瀾：大市有機下破23000點
經過前日急跌超過四百點，港股在期指結算日仍係反彈乏力，即使美股前晚跌過百點後，收市跌幅大為收窄，但港股仲係無動於衷，恒指尋日升46點，報23,210點，成交縮減至760億元。
人民幣兌美元繼續回吐，執筆時見6.6878，美匯指數在76至77水平形成初步支持，似乎炒QE2推出及人民幣升值的熱錢，有鳴金收兵之勢，對股市不利。
昨日所見，十一月期指的即市阻力位，有一浪低於一浪的感覺，23,240、23,210、23,160，最後以23,112點，低水98點，全日都無力逼近既定的23,270點止賺位，令筆者的淡倉坐得安心。
觀乎外圍，下周美國議息，知道QE2規模有幾大之前，股市仲要過多幾關，包括美國第三季GDP、PMI、十月消費信心終值及下周初的ISM指數。在利好消息消化得七七八八，成交開始減少下，似乎23,099點支持未必係銅牆鐵壁，23,030至23,090點的食胡目標，都可能稍嫌保守，筆者決定先維持手上一半「晒士」的淡倉，主觀覺得今次調整，現貨好大機會見23,000點樓下。
John Mullen