好多嘢對得太耐嘅話就會生厭，中國海洋石油（00883）董事長傅成玉就列舉咗一個好好嘅例子，佢話以海洋為例，畀人嘅感覺係浪漫，但以佢作為過來人嘅經驗證明，長期喺海上工作及生活，只有單調加枯燥。
傅成玉尋日與網友進行交談，有啲網友認為喺海上採油，有蔚藍嘅大海作伴，一定非常浪漫。但傅成玉就話只有嗰啲唔係長期喺海上工作及生活，唔了解海上工作生活艱辛嘅人，先至會覺得浪漫。
早前傅成玉陪同中國工程院嘅院士到海上採油平台視察，佢哋睇到一條長10米左右嘅虎頭鯊，的確好靚。不過長期工作及生活都喺呢度，有時悶到搵隻雀仔睇吓都冇，咁單調、枯燥嘅生活，唔係個個頂得順，特別係剛入職嘅年輕人，情緒上有時會十分煩躁。
唔單只悶，好多嚴峻嘅壓力亦唔係一般人所理解。傅成玉本身就遇過唔少驚險鏡頭，佢喺南海工作時遇過一次颱風，颱風吹正平台，最後佢哋都要撤離，風力強勁令佢哋冇辦法企起身，只能趴住走，直升機門未關好就強行起飛，如果走遲啲，飛機都會吹落海，飛咗一個多小時，機門一直冇關上，落機時成個人都傻咗，又點會有浪漫Feel。
余絲韻