絲絲講場：火箭3猛將訪匹克睇戰靴
NBA球隊休斯敦火箭前兩日訪華，喺北京仲同新澤西網隊打咗場波，「中國長人」姚明都有上場，可惜絲絲無緣親眼現場欣賞。除咗姚明返老家比賽之外，火箭仲有3位球員都喺中國受到特別招待，佢哋有一個好大嘅共通點，就係3個都係匹克體育（01968）襄助嘅球員。
夥姚明參觀研發中心
呢3位火箭球員分別係柏堤亞（Shane Battier）、路維（Kyle Lowry）及柏達臣（Patterson）。路維及柏達臣到達北京第一日就已經馬不停蹄，參觀位於北京東三環嘅匹克創意研發中心，親眼睇吓匹克點樣製造佢哋嘅戰靴，柏達臣唔單只參觀，仲「落手」整咗個手膜，唔知匹克會將呢個紀念品擺喺邊呢？
佢哋亦與隊友姚明一齊參觀，所以沿途吸引好多球迷。匹克首席執行官許志華就分析點解簽咗呢幾位代言人，話係因為以前要靠一啲球星去增加公司知名度，依家公司成熟咗，就要搵啲有潛力嘅年輕球員，打造自己品牌嘅球星。
余絲韻