滙豐銀行一向講求員工嘅工作效率，但亦好注重佢哋喺工作與生活之間嘅平衡，所以一直好積極推動員工參加運動項目，早前就搞咗個山頂環跑賽，有300名跑手參加，其中有50幾位員工及家屬組隊參加家庭組別嘅「奪寶奇兵」比賽，呢個不失為一個共享天倫嘅好節目，事關一家人喺香港搵個好節目嚟消遣都唔容易。
唔講你唔知，原來滙豐銀行香港區總裁馬凱博（Mark哥）係佢哋嘅體育會會長，佢都好鍾意跑步，參加呢項比賽就最適合不過。當日Mark哥與滙豐銀行體委會主席區佩兒做頒獎嘉賓，不過最可惜係主人家滙豐銀行無緣問鼎冠軍，未能從自己人手上取得冠軍獎項。
聽講滙豐銀行今年邀請咗13間工商機構參加呢次盛事，賽事由夏力道為起點，沿盧吉道返回作終點嘅山頂廣場，結果男女子組冠軍分別係九巴及怡和體育會。
余絲韻