絲絲講場：恒隆大連剪綵騎警迎賓
近年已變成咗「大半隻」內地收租股嘅恒隆地產（00101），尋日喺大連為佢哋喺當地嘅恒隆廣場搞咗個開工剪綵儀式，仲好罕有咁有騎警出現。
絲絲尋日亦去咗趁熱鬧，以前去過好多同類型嘅動工儀式，一般都唔少得舞獅、鼓手表演，今次有啲唔同，就係有騎警喺現場歡迎來賓，相當夠派頭。恒隆地產董事總經理陳南祿（Philip）同絲絲講，話呢度啲騎警嘅馬都係由香港賽馬會運過去，佢又向絲絲介紹咗一啲大連景點嘅歷史，睇嚟Philip知識都好廣，又或者佢係做定咗功課喇。
陳南祿忙北上巡察
不過，絲絲想知多啲有關恒隆嘅事，但Philip就似乎唔多想講太多，叫大家問陳生（董事長陳啟宗），睇嚟佢都相當口密！返工已經有兩個幾月嘅Philip話，對於呢份工嘅感覺好好，佢呢兩個月嚟都會不斷返內地，睇吓公司嘅項目，仲話依家基本上已經睇晒全部項目添！話晒恒隆都有咁多項目喺內地進行緊，絲絲相信佢嚟緊一定都會幾忙。
余絲韻