呢兩個月係結婚旺季，絲絲都收到幾個紅色炸彈，功夫了得嘅第一信用財務及國藝控股（08228）主席冼國林（Checkley）定咗喺下周一擺酒結婚，佢喺佛山嘅私人投資亦會於同一日落實，果真係雙喜臨門！
Checkley同佢嘅另一半羅寶兒（Cheery）會喺本月二十七日（下周一）設婚宴，正式拉埋天窗，絲絲一聽到佢哋結婚嘅消息，即刻致電新郎哥恭賀一番。聽Checkley講，國藝其實喺八月已「提早」宣布咗兩人嘅喜事，因為國藝委任Cheery做董事，Checkley與Cheery已共同生活咗一段時間，按上市條例，佢有需要基於「事實婚姻」嘅精神「提早」申報兩人嘅夫妻關係，到近日才正式註冊及設宴公告親戚朋友。
至於另一單喜事，係Checkley咁啱喺同一日，喺佢師公葉準嘅故鄉佛山西樵有一項私人投資會正式落實，由於要配合當地政府嘅簽約儀式，佢目前唔方便透露詳情。兩件喜事撞期真係好難取捨，最終Checkley決定派代表到西樵出席簽約儀式，絲絲亦認為係明智抉擇，喺呢度祝賀Checkley事業與愛情兩得意。
余絲韻