上次講完《孫子兵法》得到讀者電郵回應，所以今次講吓另一本中國嘅奇書《道德經》。老子認為「天下萬物出於有，有出於無」，所以我哋要成功做好一件事最好「圖難於其易，為大於其細」、「為之於未有，治之於未亂」全部睇落好似係對立嘅嘢，其實即係「你頂住我，我頂住你」，互相依存，互相轉化，好有太極呢種感覺喺度，所以行事嗰時盡量做到「無為」同「無欲」。老子嘅《道德經》散發中國人應有嘅智慧。《道德經》因為對事物有高度包含性，所以係屬於哲學範疇嘅書籍，雖然依家進入高科技嘅金融投資時代，《道德經》亦成為教人投資心態上嘅一本經典，每個投資者如果能慢慢掌握，必定拍案叫好。
都係講唔晒，搵幾則同大家分享分享，得閒自己再搵書睇，以下係一啲《道德經》喺投資策略上嘅應用。
一、「道可道，非常道；名可名，非常名。」
投資可以好清楚咁講明，就唔係永恒不變嘅道理，因為呢啲道理高深莫測，好難用普通嘅文字同語言解釋，我哋成日希望對投資市場同埋投資嘅項目能夠整理出一個感應，畀事物嘅規律一個名，但係事物成日都變，同我哋腦海裏面形成嘅概念同事物真相總係有一段距離。
二、「知常曰明，不知常，妄作凶。」
能夠認識事物規律嘅人先係真正聰明人，如果投資都唔認識市場規律，輕舉妄動，必定造成災禍或者招致萬劫不復嘅損失。
三、「少則得，多則惑，是以聖人抱一為天下式。」
少取反而會得到，多取反而會被迷惑。作為投資者緊守住自己嘅宗旨，可以成功咁成為眾人嘅模範。
香港大學電子金融服務榮譽助理教授 徐燦傑