上海商業銀行喺金融海嘯前買埋中環總行隔籬嗰幢大樓，依家嘅總部明年就開始拆，新大樓將由名設計師嚴迅奇設計，會喺5年後落成，樓高28層。上商董事長榮智權（Lincoln）好風趣咁話「唔少得『跳吓層』啦」，因為14樓及24樓都唔會有。絲絲諗落咁都啱嘅，始終中國人地方，做生意最怕唔吉利。
中環甲級商廈供不應求，上商依家嘅總部未用盡地積比率，Lincoln話買埋隔籬大廈再起過，5年後先起好，到時仲可以租番一半出去。點解咁捨得？佢話新總部起好後有成14萬方呎，地方闊落，依家中環租金貴，自己唔捨得用，會租一半出去，反而有部分辦公地方會搬去觀塘及尖沙咀等地區。
Lincoln回憶當時買隔籬大樓之後冇幾耐就發生金融海嘯，買完後個價係咁跌，好彩依家升番晒，而且仲撞啱政府話將旁邊嘅西座政府大樓重建做新甲廈，更加帶旺呢頭嘅物業。
余絲韻