絲絲講場：俄鋁歐柏嘉分享首富之路
俄鋁（00486）係首家喺香港上市嘅俄羅斯企業，自然受到唔少投資者關注，佢哋依家業務遍布19個國家，有超過7萬名員工，作為CEO嘅歐柏嘉要率領咁龐大嘅團隊，真係要智勇雙全。佢尋日就同大家分享成功之路，吸引咗480個觀眾，梁愛詩、夏佳理等猛人亦有畀面捧場。
年輕創業購併壯大
歐柏嘉喺26歲時已係當時數一數二鋁業公司主管，○八年仲成為俄羅斯首富，佢話最緊要係識得揀一條啱嘅路去行，好似佢原本係讀物理系，但讀讀吓覺得有啲悶就轉去經濟學系，可能咁先至有今日嘅成就。講到成功因素，佢就話個人能力、機遇及政治脈絡等因素都要結合，仲鼓勵大家必須對自己有信心及把握機會，再向目標前進。
歐柏嘉讀完大學後，自行創立咗一間小型金屬貿易公司，賺到錢就收購咗西伯利亞一間鋁冶煉廠，喺九四年做埋公司總監，自此開始從事鋁業呢行。佢喺短短3年內，改善產品質素、技術發展及擴大公司產能，將公司提升至成為全球十大鋁產品生產商之一，至○七年聯同其他兩間資源公司成立俄鋁，真正做到全球No.1。
余絲韻